透明牙箍引入香港超過10年,近年因有名人代言而流行,其中兩大美國品牌隱適美(Invisalign)及3M較為人熟悉。今次涉及無牌行醫事件的透齒亮(Clear Braces)以「每日只需$37」平價作招徠,近半年迅速冒起。
牙醫表示,透明牙箍不能完全取代傳統牙釘加金屬線,「唔係個個人都啱用,夾硬用個效果未必靚」。
香港牙醫學會副會長王志偉指,透明牙箍並非新技術,內地製造的成本低廉,「其實最主要係個software(軟件),做牙套出嚟,逐少逐少咁郁啲牙」。
須磨走0.5毫米琺瑯質
用透明牙箍較美觀,也較傳統的箍牙技術少不適及痛楚,但卻非萬能,「唔能夠完全代替傳統箍牙,唔係人人都啱用,主流仲係傳統(牙釘加金屬線)嗰隻,但因為廣告效力大,好多人都要求用,不過牙醫想做得靚啲,最後都會用金屬線執手尾」。
使用透明牙箍矯齒,王說醫生多建議病人磨牙而非脫牙才戴上牙箍,「因為剝一隻牙有成7毫米,好遠,你要啲牙郁咁多唔係咁易,用透明牙箍直情戴唔到,磨牙易好多,每隻磨0.5毫米」。
王又指,牙齒最表面的琺瑯質約厚1毫米至1.5毫米,一般磨牙只磨0.25毫米至0.5毫米,「要留番足夠嘅琺瑯質,磨太多,露出象牙質會敏感、易蛀牙,琺瑯質冇咗唔會生番出嚟,磨三分一已經好盡」。
|