財爺失驚無神再出招,樓市暫時凍咗啲,係咪止到咳,仍有待觀察,其實佢都冇預到可以一招降火,隨時會有後着,辣招唔會停!
知情人士拆解財爺嘅策略思維指,由於樓市繼續㷫烚烚,早前振英哥份施政報告又被市場覺得係無牙老虎,買樓亢奮症隨即變本加厲,如果再唔出手,個市將會更癲,對政府威望極為不利,所以財爺決定加辣。佢亦知大環境冇變,辣招只可以㩒住需求,短暫降溫,好快又會熱番,到樓市又發癲,就再出招遏一遏,但求熱度唔升高就算,只要市民肯遲啲買樓,等到兩年後供應大增,就唔會滿街負資產。
知情人士講,外面以為財爺已冇乜招可出,其實大錯特錯,由兩年前開始,佢同一眾幕僚已度出各級威力嘅招數,擺晒喺櫃桶,隨時可以攞出應市,如有必要,加辣加鹹都得。
有人問:點解財爺唔等埋財政預算一齊出招?知情人士話有兩個原因:一來今次預算有好嘢出,可以幫政府爭取公眾好感,唔想畀辣招分散注意力;二來如辣招成為重點,大家就會用出招效果衡量預算案成績,須知樓市冇人可控制,若然個市唔聽政府支笛,市民一定噓噓聲。所以財爺在預算發表前出招,實屬上策。 下下策係等到預算發表後至出招,因為市民以為財爺已冇晒符,樓市將燒得更烈,到時再出手,就顯得極之被動,局面更加不可收拾。
|