正視9個身體小毛病！

sophie

或者你無大病大痛，但有時會傷風感冒，小毛病如頭暈、頭痛、腸胃不適、疲倦不堪則經常發生，總之無傷大雅，你就自我感覺健康。不過，有時小毛病往往係一啲嚴重問題嘅警號，如果你能夠及早處理，健康身體應可長伴你左右。

作為精靈又愛錫自己嘅city girl，關注健康當然都要理性同精明啲，畢竟擔心同憂慮並唔會改善健康，以行動正視問題先係city girl應有嘅態度。不妨好好注意一下，自己有無以下徵狀？

1. 月經不見踪影

月經周期通常由28日到40日不等，只要周期穩定就應該無大礙，但如果你嘅月經周期極不穩定，甚至經常兩、三個月先來經一次，咁你身體一定有某啲問題，例如你精神好緊張，或者營養不良、體力透支，令身體脂肪量過低，於是造成排卵困難，月經就會不見影了。就算你暫時無懷孕計劃，都唔應該漠視經期問題，除咗睇醫生，更應該立刻停止俾自己過多壓力。

2. 眼皮失控地跳動

眼皮偶爾跳動幾下，代表眼睛感到疲倦，極可能係你長時間用電腦或睇一啲極細嘅文字，令眼睛過分用神。要舒緩眼皮跳動，可用冷毛巾敷上幾分鐘，咁樣可以令繃緊嘅神經鬆馳落嚟。最好嘅做法係每工作半個鐘就俾雙眼休息兩分鐘。
假如眼皮跳動出現過於頻繁，最好俾醫生檢查一下，睇睇有無神經系統失調嘅問題。

3. 「飛蚊」滋擾

「飛蚊症」就係眼前好似有蚊子、小蟲子或黑點，揮之不去，睇光亮或淺色嘅畫面時尤其明顯。喺醫學界嚟睇，係一種自覺症狀，大概同年紀、近視等有關，如果情況唔太嚴重，只要懷着平常心與之共存，唔好太在意就可以減輕煩擾嘅感覺。但如果飛蚊加劇及伴隨閃電光影，就要立刻睇醫生檢查一下。

4. 半夜醒來難以再睡

如果你好鍾意飲酒的話，呢個可能就係導致你睡眠失調嘅原因。臨瞓前飲酒會影響我哋嘅深睡狀態，往往令我哋半夜醒來，因為嗰個時候酒精已被身體處理，睡意亦消失，於是難以再入睡。假如要夜晚飲酒，可以嘗試喺瞓前4小時只飲一杯，以減少對身體造成傷害。如果情況持續，可能係比較嚴重嘅失眠症，喺夜晚唔好過分用腦、勞神，嘗試做啲令精神放鬆嘅活動如睇消閒書、聽輕音樂。

5. 乳房變得硬硬的

當自己檢查乳房時，發現一啲好似小石頭又唔固定嘅小硬塊，甚至會覺得乳房疼痛及漲滿，大概患上「乳房纖維囊腫」，喺月經前會更明顯。成因仲未完全清楚，但大概同卵巢賀爾蒙有關。要減輕徵狀，最好戒掉咖啡、可樂、茶及朱古力呢啲含咖啡因嘅食物，另外亦最好少食鹽，因為咖啡因同鹽會留住過多水分，令纖維囊腫徵狀更明顯。

6. 黑眼圈持續不去

黑眼圈同睡眠質素有關，大概所有貪靚嘅女生都好清楚，既然如此，獲得充分睡眠（專家建議每天8小時）就係改善黑眼圈嘅不二法門。此外，亦避免用手指觸摸及磨擦眼肚，咁樣只會令黑眼圈更明顯。假如黑眼圈持續不去或越來越嚴重，應求醫檢查，睇睇係咪有貧血嘅可能。

7. 四肢感到不尋常刺痛

當你唔係做運動或體操時，四肢卻感到刺痛或好似有針刺一樣，極可能因為你著嘅衫太緊，阻礙咗血液循環，造成局部麻痺嘅感覺。最好嘅做法當然係減少穿著過緊嘅衫。假如四肢嘅刺痛或麻痺感覺經常出現，最好檢查一下，睇睇神經系統或組織有無問題。

8. 褲頭突然變得緊了

你唔係肥咗，或者月經來潮，但褲頭突然變細咗，可能係因為水腫問題。你係咪鍾意飲酒？酒精會引起脫水問題，於是腎臟會收到「貯存水分」嘅訊息，而最後你會感到肚子脹脹，褲頭變緊。想解決呢個問題，每隔兩個鐘飲一杯水，期間唔好吸收鹽分，持續一日後，身體嘅排水功能應該會回復正常。

9. 站起來見頭暈

俗語話「踎低起身見頭暈」，就係話人血氣不足，而從西醫角度睇，原因大概係脫水引致血壓下降，造成頭暈感覺。補充水分係最直接嘅解決方法，除咗每日飲8杯水之外，食飯時盡量食水分多嘅食物，如湯、粥、沙律、水果等。假如經常頭暈，甚至有暈倒嘅跡象，就應該立即就診，因可能係貧血，甚至心臟出咗問題。

ngkawai8792

danwanson